2021 ОНЫ 12 ДУГААР САРЫН СҮҮЛЧИЙН АРАВ ХОНОГИЙН ЦАГ АГААРЫН НӨХЦӨЛИЙН ТОЙМ

2021 ОНЫ 12 ДУГААР САРЫН СҮҮЛЧИЙН АРАВ ХОНОГИЙН ЦАГ АГААРЫН НӨХЦӨЛИЙН ТОЙМ

            Өнгөрсөн арав хоногт Агаарын температурын арав хоногийн дундаж ихэнх нутагт 17.0-23.5 градус, уулархаг нутаг болон Увс нуурын хотгороор 24.0-30.2 градус хүйтэн (1 дүгээр зураг) буюу олон жилийн дундажтай харьцуулбал ихэнх нутагт дунджийн орчим ба дунджаас 0.5-3.8 градусаар дулаан, Түргэн суманд 1.2 градусаар хүйтэн байлаа.

Агаарын температур өдөртөө Өндөрхангай, Наранбулаг, Ховд, Өмнөговь, Зүүнхангай, Өлгий, Цагаанхайрхан сумдын нутагт 0-6 градус, Завхан, Бөхмөрөн сумдын нутгаар 7-13 градус, Увс нуур хотгор болон уулархаг нутгаар 14-18 градус хүйтэн, шөнөдөө Малчин, Тэс, Улаангом, Давст, Зүүнговь, Сагил сумдын нутагт 34-39 градус,  Өндөрхангай, Наранбулаг, Бөхмөрөн, Цагаанхайрхан сумдын нутгаар 24-29 градус, бусад нутагт 29-34 градус хүйтэн байв.

            Хөрсний гадаргын температур өдөртөө уулархаг нутаг болон нутгийн баруун хэсгээр 8-14 градус хүйтэн,  Өндөрхангай, Өмнөговь сумдад 0-5 градус дулаан, бусад нутагт 1-7 градус хүйтэн, шөнөдөө ихэнх нутагт 30-35 градус, уулархаг нутаг болон Увс нуурын хотгороор 36-41 градус хүйтэн байлаа.

            Хур тунадас нийт нутгийн 70 гаруй хувьд 0.0-1.1 мм,  Наранбулаг, Улаангом, Баруунтуруун, Зүүнговь, Түргэнд 1.5-3.3 мм орсон бол Зүүнхангай суманд тунадас ороогүй (2 дугаар зураг). Орсон хур тунадасны хэмжээг олон жилийн дундажтай харьцуулбал нийт нутгийн 70 гаруй хувьд олон жилийн дунджийн орчим буюу түүнээс бага, Улаангом, Баруунтуруун, Өмнөговь, Зүүнговь, Түргэн сумдын нутгаар дунджаас ахиу байлаа.

12 дугаар сарын 31-ны байдлаар нийт нутгийн 80 гаруй хувьд цастай байгаагаас Хан Хөхийн нуруу, Хархираа Түргэний уулсаар 20,1 см-ээс их,  Малчинд 25 см, Хяргас, Зүүнговь, Баруунтуруун, Тариалан сумдын нутгаар 11-20 см, Улаангом, Тэс,Сагил, Түргэн сумдын нутгаар 5-10 см, нутгийн баруун болон говийн нутгаар, зүүн өмнө хэсгийн  зарим нутгаар 1-4 см цастай, Зүүнхангай сумдын нутгаар цасгүй (3 дугаар зураг) байна.